काठमाडौं । साताको पहिलो कारोबार दिन सोमबार सेयर बजार ४३.८९ अंक घटेको छ । यो कमीपछि नेप्से परिसूचक २५१३ अंकमा कायम भएको छ ।

कारोबार रकम केही घटेको छ । अघिल्लो दिन ३ अर्ब ७८ करोडको कारोबार भएकोमा आज ३ अर्ब ६४ करोडको भयो । बजार खुलेपछि दिनभर रातो रह्यो । जम्मा २१ कम्पनीको मूल्य बढ्दा २५३ को घट्यो भने ४ को स्थिर रह्यो ।

गत बुधबार गएको भीषण बाढीपछि बजारमा लगातारजसो तीन समूहमा उच्च दबाब परिरहेको छ । यस्तो दबाब पर्ने क्रम आज पनि जारी रह्यो । निर्जीवन बीमा सबैभन्दा धेरै ५.०३ प्रतिशत घट्यो । त्यस्तै अन्य समूह ३.३० र जलविद्युत् समूह २.९४ प्रतिशत घटे । बाढीपछि यी तीन समूह नै बजारमा अत्याधिक दबाबमा परिरहेका छन् ।

बाढीका कारण एक दर्जन बढी जलविद्युत् आयोजना अत्याधिक प्रभावित भएका छन् । त्यस्तै सवारीसाधन, घर, जलविद्युत् आयोजनाको बीमा रकम भुक्तानी गर्नुपर्ने भएपछि निर्जीवन बीमा र अन्य समूह बढी प्रभावित भएका हुन् । अन्य समूहमा नेपाल पुनर्बीमा र हिमालयन रिइन्स्योरेन्स कम्पनी पनि पर्दछन् ।