काठमाडौं । नेपाली बजारमा सुनको मूल्यमा लगातार वृद्धि भएको छ । पछिल्लो तीन दिनमा १५ हजार ४ सय बढेको सुनको भाउ आज पनि बढेको छ। 

सुनको मूल्य आज तोलामा ३ हजार २ सय रुपैयाँ बढेर ३ लाख २२ हजार ७ सय पुगेको नेपाल सुनचाँदी व्यवसायी महासंघले जनाएको छ। 

सुनको भाउ हिजो तोलामा २ हजार ८ सय रुपैयाँ बढेर ३ लाख १९ हजार ५ सय कायम भएको थियो।  यसअघि गएको बिहीबार सुनको भाउ तोलामा ९ हजार ३ सय र शुक्रबार ३ हजार ३ सय रुपैयाँ बढेको थियो। 

आजसहित चार कारोबार दिनमा सुनको भाउ तोलामा १८ हजार ६ सय रुपैयाँ बढिसकेको छ। त्यसैगरी आज चाँदीको मूल्य भने आज पनि घटेको छ। 

हिजो तोलामा १० रुपैयाँ घटेर चाँदीको भाउ आज पनि तोलामा १० रुपैयाँ नै घटेर तोलाको ४ हजार ९ सय ६५ रुपैयाँमा झरेको महासंघले जनाएको छ। 

गएको माघ १५ गते  सुनको भाउ तोलामा २० हजार पाँचसय रुपैयाँ बढेर तीन लाख ३९ हजार तीनसय रुपैयाँ पुगेको थियो। नेपाली बजारमा सुनको यो मूल्य हालसम्मकै सबैभन्दा उच्च हो। 

त्यसैगरि गएको माघ १८ गते चाँदीको मूल्य तोलामा १५ सय ६५ रुपैयाँ घटेको थियो। चाँदीको मूल्यमा आएको यो गिरावट हालसम्मकै सबैभन्दा उच्च हो।

गएको माघ १५ गते चाँदीको भाउ तोलाको सात हजार ५०५ रुपैयाँ पुगेको थियो। चाँदीको यो मूल्य अहिलेसम्मकै सबैभन्दा बढी हो।