अमेरिकी राष्ट्रपति डोनाल्ड ट्रम्पको हस्तक्षेपपछि अमेरिकी राष्ट्रिय फुटबल टोलीका स्टार फरवार्ड फोलारिन बालोगुनमाथिको एक खेलको प्रतिबन्ध फुकुवा भएपछि विश्व फुटबलमा नयाँ विवाद चुलिएको छ।

बोस्निया–हर्जेगोभिनाविरुद्धको विश्वकप अन्तिम–३२ को खेलमा रातो कार्ड पाएपछि बालोगुन स्वतः एक खेलका लागि निलम्बित भएका थिए। त्यसका कारण उनी बेल्जियमविरुद्धको अन्तिम–१६ को महत्त्वपूर्ण खेल गुमाउने निश्चितजस्तै थियो।

तर ट्रम्पले फिफा अध्यक्ष जियानी इन्फान्टिनोलाई फोन गरी उक्त निर्णय पुनरावलोकन गर्न आग्रह गरेपछि फिफाले अनुशासन संहिताको धारा २७ प्रयोग गर्दै उनको प्रतिबन्ध स्थगित गरेको जनाएको छ।

रातो कार्ड भने कायम रहनेछ, तर एक वर्षको परीक्षण अवधिमा राखिएकाले बालोगुन बेल्जियमविरुद्ध मैदान उत्रिन पाउने भएका छन्। 

फिफाको यो असाधारण निर्णयसँगै विश्व फुटबलमा निष्पक्षता र राजनीतिक हस्तक्षेपबारे तीव्र बहस सुरु भएको छ।

बेल्जियम फुटबल संघले प्रतियोगिताको नियम र समानताको सिद्धान्तमाथि प्रश्न उठाउँदै निर्णयप्रति असन्तुष्टि जनाएको छ भने आवश्यक कदमबारे छलफल भइरहेको जनाएको छ। 

अमेरिकी टोलीका लागि भने यो ठूलो राहतको विषय बनेको छ। प्रतियोगितामा तीन गोल गरिसकेका बालोगुन टोलीका प्रमुख आक्रमणकर्ता हुन्।

प्रशिक्षक मौरिसियो पोचेटिनो र कप्तान क्रिस्टियन पुलिसिकले उनको पुनरागमनले टोलीको मनोबल उच्च बनाएको बताएका छन्। 

यद्यपि, ट्रम्पको फोनपछि आएको फिफाको निर्णयले विश्व फुटबलमा राजनीतिक प्रभावको सीमाबारे गम्भीर प्रश्न खडा गरेको छ। सामाजिक सञ्जालदेखि खेल विश्लेषकहरूसम्म धेरैले यस्तो निर्णयले विश्वकपको विश्वसनीयतामाथि असर पार्न सक्ने टिप्पणी गरेका छन्।

आगामी दिनमा फिफाले यस विषयमा थप स्पष्टता दिने अपेक्षा गरिएको छ।