मनसुनी प्रणाली भारतको केरला हुँदै केहीदिनमा नेपाल आइपुग्ने



काठमाण्डौ । नेपालमा आउने मनसुनी प्रणाली भारतको केरलामा आइपुगेको छ । नेपालमा आउने मनसुनी प्रणाली बंगालको खाडीमा विकास भएर हिजो बेलुका भारतको केरलामा आइपुगेको मौसम पूर्वानुमान महाशाखाले जनाएको छ । उक्त प्रणाली एक हप्तामा नेपाल आइपुग्ने सम्भावना रहेको छ ।

सन् २०१० देखि २०२० सम्मको औसत विवरणअनुसार नेपालमा जुन १३ मा मनसुनी प्रणाली आइपुग्छ । यस वर्ष पनि जुन १३ अर्थात जेठ ३० गते आसपासमै नेपालमा आउने महाशाखाले जनाएको छ ।
यस वर्षको मनसुनमा औसतभन्दा धेरै पानी पर्ने छ भने समयमै सुरु हुने मनसुनमा चार महिनासम्म रहने मौसम पूर्वानुमान महाशाखाले जनाएको छ । अहिले वाग्मती प्रदेश, गण्डकी प्रदेश र सुदूरपश्चिम प्रदेशमा आंशिकदेखि सामान्य बादल लागेको छ भने अरु ठाउँको मौसम सामान्यतया सफा रहेको छ ।

अहिले पश्चिमी वायु र स्थानीय वायुको सामान्य प्रभाव रहेकोले केही ठाउँमा बादल लागेर सामान्य पानी पर्ने सम्भावना रहेको महाशाखाले जनाएको छ । प्रि–मनसुनको समय भएकाले दिउँसोपख केही ठाउँमा सामान्य पानी पर्ने भए पनि अबको तीन दिन ठूलो पानी पर्ने सम्भावना कम रहेको मौसम पूर्वानुमान महाशाखाले जनाएको छ ।