सरकारमा जान जसपाको तीनबुँदे सर्त, प्रधानमन्त्री सकारात्मक



काठमाडाैं : जनता समाजवादी पार्टी (जसपा) का शीर्ष नेताहरूको प्रधानमन्त्री केपी शर्मा ओलीसँगको उच्चस्तरीय भेटघाट सकारात्मक देखिएको छ ।

बैठकमा जसपाले सरकारमा सहभागी हुन राखेको तीनबुँदे सर्तमाथि प्रधानमन्त्री ओली सकारात्मक देखिएका बैठकमा सहभागी जसपाका नेता लक्ष्मणलाल कर्णले बताए। जसमा संविधान संशोधन, रेशम चाैधरीको रिहाइ, कैदीबन्दीको मुद्दा फिर्तालगायत माग आफूहरूले राखेका उनको भनाइ थियो।

छलफलमा सहभागी प्रधानमन्त्रीका परराष्ट्र सल्लाहकार राजन भट्टराईले भने, ‘आजको बैठकमा धेरै विषय भए। छलफललाई निरन्तरता दिइने कुरा भएको छ। उहाँहरू (जसपा) ले उठाउनुभएको विषयप्रति प्रधानमन्त्री सकारात्मक देखिनुभएको छ। फेरि पनि यसबारे औपचारिक अनौपचारिक बैठक भइरहन्छ।’

जसपाका नेताहरूले प्रधानमन्त्रीसँग राखेका मागबारे भने उनले खुलाउन चाहेनन्। आगामी दिनमा फेर पनि बैठक बस्ने र यसबारे टुंगो लाग्ने उनले बताए। प्रधानमन्त्री ओलीले बिहीबार एमालेका शीर्ष तहका नेतासँग जसपाको मागको विषयलाई लिएर छलफल गरेका थिए।

​जनता समाजवादी नेपाल जसपाका ५ शीर्ष नेताहरू प्रधानमन्त्री केपी शर्मा ओलीसँग भेटवार्ता गर्न बालुवाटार पुगेका थिए। सत्ता सहकार्य र आफ्ना एजेण्डाबारे छलफल गर्न नेताहरू बालुवाटार पुगेका हुन्।